Ministria e Punëve të Jashtme e Kosovës është në prag të zgjedhjes së drejtorit të Departamentit të Çështjeve Rajonale, i cili mund të jetë udhëheqës i delegacionit të nivelit teknik të Kosovës, në bisedimet mes Prishtinës dhe Beogradit.
Tashmë zyrtarët e MPJ-së i kanë finalizuar të gjitha procedurat e konkursit dhe në këtë pozitë do të zgjidhet një ndër gjashtë personat e përzgjedhur në mesin e dhjetëra konkurrentëve, shkruan Zëri.

Të përzgjedhurit kanë kaluar testimin me shkrim dhe kanë hyrë të enjten në atë me gojë.

Ata janë: Ramush Tahiri, analist politik, Bujar Desku, zyrtar i lartë në MPJ, Arben Çollaku, magjistër i marrëdhënieve ndërkombëtare, Adurrahman Zhubi, zyrtar i lartë në Ministrinë e Kulturës, Sadri Abazi dhe një zyrtare e MAPL-së.

Njëri ndër ta, së shpejti do të jetë drejtor i Departamentit të Çështjeve Rajonale, departament mbi të cilën do të bjerë barra kryesore e organizimit të bisedimeve teknike Prishtinë-Beograd.

Kurse, rreth faktit se a do të jetë drejtori i këtij departamenti të MPJ-së kryesues i delegacionit të palës kosovare, kjo do të varet nga kryeministri i Kosovës dhe MPJ-ja, institucione të cilat do të përcaktojnë kryesuesin e ekipit teknik të Kosovës.

Ndërkaq, Qeveria e Serbisë ka njoftuar më herët se shef të ekipit në bisedimet teknike me Kosovën ka emëruar drejtorin politik të Ministrisë së Punëve të Jashtme, Borislav Stefanovic, ndërsa zëvendësi i tij është Vladan Jovicic. Qeveria e Serbisë, po ashtu, ka përgatitur edhe platformën e këtyre bisedimeve./