Pas mbledhjes së mbajtur në mes të drejtuesve të Partisë Demokratike të Kosovës dhe atyre të Aleancës Kosova e Re, në shtëpinë e Behgjet Pacollit në Hajvali, në përpjekje për ta bindur kreun e AKR-së që të heqë dorë nga kërkesa e tij për postin e Presidentit të vendit, burime të gazetës “Zëri” brenda AKR-së kanë njoftuar se nuk është arritur marrëveshje për koalicion qeverisës mes këtyre dy partive. “Nuk ka marrëveshje për koalicion qeverisës”, i ka thënë burimi gazetës, në kushte anonimiteti.
Jozyrtarisht mësohet se arsyeja e mos-arritjes së marrëveshjes për bashkë-qeverisje mes PDK dhe AKR ka qenë insistimi i presidentit të AKR-së për të marrë postin e Presidentit të Kosovës, ndërkaq këtë nuk e kanë pranuar zyrtarët e PDK-së të pranishëm në takim. Zyrtarë të PDK-së kanë insistuar që posti i Kryeministrit dhe ai i Presidentit të Kosovës tu mbeten atyre, njofton Zëri.

Ndërkaq, gjatë ditës së enjte, pas mbledhjes së Kryesisë së PDK-së, anëtari i kryesisë së kësaj partie, Memli Krasniqi, ka thënë se partia nuk ka vendosur nëse do t’i bëhet ofertë ndonjë partie tjetër veç AKR-së. “PDK nuk ka marrë asnjë vendim që t’i bëjë ftesë AAK-së, LDK-së apo Vetëvendosjes. Sa i përket “Listës Dr. Ibrahim Rugova” dhe minoriteteve, PDK ka pika të përbashkëta dhe do të bisedohet me këto gjatë ditëve të ardhshme”, ka thënë Krasniqi në një prononcim pas mbledhjes.